নৱবৰ্ষ
কিদৰে লিখিম তোমাৰ নাম
চানডুবিৰ জলৰাশিত
অথবা
বগামাটিৰ শুভ্ৰ বলুকাত
তোমাৰ গাত বিগত বৰ্ষৰ মলি
তোমাৰ দুৰ্গন্ধময় গুহ্যদ্বাৰেদি
অনৰ্গল ৰাষ্ট্ৰশাসকৰ অহা যোৱা
তোমাৰ শিৰত
দুই নম্বৰী সোনপাতেৰে সজা
সোনালী
প্ৰতিশ্ৰুতিৰ মুকুট
নৱবৰ্ষ
কিদৰে লিখিম তোমাৰ নাম
প্ৰেয়সীৰ বাবে অনা গ্ৰিটিংছ কাৰ্ডৰ লেফাফাত
অথবা আঢ়ৈশ টকীয়া
নতুন ডায়েৰীৰ পাতত
কপট ৰাজনীতিৰ হাতোঁৰাত
প্ৰতিটো দিন
প্ৰতিটো ঋতু
আস্তাবলত বন্দী গণতন্ত্ৰ
স্বদেশৰ জৰায়ু ভেদি
প্ৰতিনিয়ত
বেফিকিৰ ধৰ্ষণৰ
ধাৰাবাহিক পৰ্ণগ্ৰাফী
নৱবৰ্ষ
কোনে লিখিব তোমাৰ নাম
হীৰকজ্যোতি মহন্তৰ ফটোত
অথবা
চকুলোৰে মচা
ছেম ষ্টেফৰ্ডৰ চোতালত
প্ৰতিটো বছৰৰ শেষত
ৰাষ্ট্ৰৰ নিৰ্ভেজাল উপহাৰ
আৰু
পিঠিৰ ছালৰ ওপৰত
বছৰেকীয়া পৰীক্ষাৰ অন্তত
গড়লৈ উৎপৰিৱৰ্তন হোৱা
আমাৰ বিলুপ্তপ্ৰায় ভৱিষ্যত ।
No comments:
Post a Comment