পাহাৰখনলৈ চাই চাই
কলীপেহীয়ে ৰাউচি জুৰি কান্দি মৰে ৰাতি
গধূলি গৰুহাল উভটি আহে
সোনটিহে জানো কিয় নাহে ?

দিনৰ পাহাৰ
ৰাতিৰ জুই
কোনে খেদে
কোনে মৰে !

পেহীয়ে শুঙি চায় আলনাৰ চোলা
এজনীয়া বিচনাখন সোনটি সোনটি লগা

কিনো ৰান্ধে
কিনো খায় পেহীয়ে ?
দুপৰীয়াৰ আবদাৰটোহে নিতৌ
নঙলামুখত লাগি থাকে
“আই ভোক লাগিছে ভাত দে ৷”

সোনটিয়ে টিউচন কৰি কিনা টেলিভিছনটো ভয়তে নোখোলে পেহীয়ে ৷
কি জানো খবৰবোৰ আহে !
জাতি মাটি ভিটীৰ কথা কোৱা
সৰ্বাবোপাইকো আজিকালি নেদেখাই হ’ল
গাওঁৰ ৰাইজে !

“আই অলপ ভালকে সাজি থাকিব নোৱাৰনে?”
কিমান যে অভিযোগ তাৰ !
আজি সোনটি আহিব ৷
সোনটিৰ কথা নেপেলায় আজি পেহীয়ে
পুৱাৰ পৰাই কত যোগাৰ
আখলত গৰম ভাত
টেঙা দিয়া সৰু মাছৰ আঞ্জা ৷

দুপৰ ৰাতিলৈ
ভুতুনীৰ দৰে সাজি বহি থাকে পেহীয়ে
গৰুহালে হেম্বেলাইছে
আজি সোনটি আহিছে ৰঙামুৱাহৈ
বুকুত এসোতা তেজ !