অৰণ্যই পোখা মেলা বাৰিষা
উৰুখে গাঁও
সেমেকে মানুহ !
শিঙৰি পাতৰ ভিজা বিচনাত
সপোনবোৰ তপত হয় গেৰিলাৰ ৷

অৰণ্য জুৰি গজি উঠা
পখৰা জোক ,
গেৰিলাৰ তেজপীয়া জোক !
মহ ,ডামৰেং , চৰপাৰ কলাজ সনা
সেউজীয়া কেমোফ্লেজ !

অৰণ্য মানেই
ভোকবোৰ উজাই অহা বুকু
বুকুবোৰ বুলেটৰ ভোক !
তথাপি সপোনে ভুই ৰোৱে পথাৰত
ন-পানী বাঢ়িলেই
মৰানৈৰ সোঁতত জপিয়ায়
সপোনৰ ৰঙীন পুঠি
মুকতিৰ ৰংদৈ হাঁহি ।

বাৰিষাৰ অন্য নাম যদি সপোন
সপোনৰ নিৰাপত্তাৰ বাবেই
অৰণ্য বিশাল ৷

ক্ৰমশঃ জোকৰ দৰে বাঢ়ি অহা
আন্ধাৰৰ সৈতে সহাৱস্থান !